ازاى أتعامل مع خطيبي

فتره الخطوبه من اجمل الفترات اللي بالتأكيد هتعيشها في حياتك ، وهي تعتبر مختلفه تماما عن فتره الزواج ودا بسب ان المسؤليات فيها بتكون اقل علشان كدا لازم تستمعتي بيها علي اكمل وجه ، ولكنك للاسف ممكن تواجهي صعوبه في التعامل مع خطيبك ودا ممكن يرجع لعدم اختلاطك مسبقا بالاولاد او عدم فهمك لشخصيه خطيبك صح وبالتالي هيحصل مشاكل كتيره بينكم وممكن تؤدي للانفصال .

وفي المقال دي هنعرضلك مجموعه من الطرق اللي هتعرفك ازاي تتعاملي معاه ، وتزودي بينكم التفاهم والحب وتستمتعوا بفتره الخطوبه مع بعض بشكل كويس

 افهمي شخصيته

في البدايه علشان تعرفي ازاي تتعاملي مع خطيبك ، لازم تفهمي شخصيته كويس جدا ودا هتقدري تعرفيه عن طريق عده اسئله لازم تجاوبي عليها بنفسك كويس :

1. _ ايه اكتر حاجات خطيبك بيحبها ؟
2. _ ايه الحاجات اللي بيكرهها وبينفر منها ؟
3. _ ايه اكتر حاجه بتعصبه ؟
4. _ اكتر وقت بيستمتع فيه امتي ؟

لازم تعرفي اجابه كل سؤال من دول وتفهمي شخصيته كويس وتكوني انطباع عام عنه ، لان فهمك لشخصيته هيساعدك بنسبه كبيره في التعامل معاه الصح وهتعرفي ساعتها امتي تحسي انه محتاجك جمبه وامتي تحسي انه محتاج يبقي لوحده .

 اديله مساحه حريه شخصيه

للاسف كتير من البنات بمجرد الارتباط بالخطيب بتحس انها امتلكت وانه لازم يقضي الـ 24 ساعه معاها هي وبس وينسي صحابه وكل الحاجات اللي بيحبها ، فمتكونيش زيهم واتعاملي معاه بذكاء في النقطه دي بانك تديله مساحه حريه شخصيه يعمل فيها كل اللي بيحبه وبكدا هتزودي التفاهم بينكم وعمره فيوم مهيزق او يمل منك او يحاول يكذب عليكي بالمكان الموجود فيه .

الي جانب انه هيتأكد انه مرتبط بشخصيه عاقله وناضجه وبالتالي هيثق فيكي ويديكي مساحتك الشخصيه الخاصه بيكي في الخروج وغيرهم من الامور الاخري .

 متبالغيش في مشاعرك

فتره الخطوبه بالتأكيد بيسودها جو كبير من الحب والرومانسيه ودا شئ مفضل علشان بتبنوا بينكم اسس قويه ومتقدرش المشاكل علي هدمها ، بس المبالغه في المشاعر وابراز الاهتمام الزايد من الممكن ان يوقعكم في الخطأ ودا شئ اكيد مرفوض دينيا الي جانب انك ممكن تخليه يظن بيكي الظنون ويفكر يتركك او يعاملك بطريقه سيئه لانه تأكد انه ضمنك .

 امدحيه دايما

الرجاله عموما بتحب المديح ، فلازم من وقت للتاني تمدحي خطيبك وتعرفيه انه احسن حد في الدنيا وانك مش بتشوفي غيره في الوجود وتثني علي الافعال اللي بيعملها وخصوصا الحاجات اللي بيعملها ليكي ودايما اكديله ان وجوده سبب تغيير حياتك .

 خليكي صادقه معاه

لازم تكوني صادقه مع خطيبك وتبتعدي عن الكدب ، لان الكدب هيزعزع الثقه بينكم وممكن دا يثير الشك في نفسه ، وهيشك فيكي باستمرار وبالتالي حياتكم هتكون سلسله مبتنتهيش من المشاكل ، بس بردو خليكي متأكده ان مش كل حاجه ينفع تتحكي لخطيبك او تتقاله ، علي سبيل المثال المشاكل الخاصه باسرتك مينفعش يعرفها او امورك الشخصيه جدا .

 كوني رفيقه له

انك تكوني رفيقه لخطيبك هيندرج تحتها عده أمور واهمها انك لازم تسمعيه كويس وتهتمي بمشاكله وتحسسيه انك مهتمه تساعديه حتي لو مش في قدرتك انك تساعديه ودايما تقفي جمبه وتأكديله انه مش لوحده في كل اللي بيمر بيه ، دا هيخليه يثق فيكي ويلجألك دايما في مشاكله كأول شخص وهتحسي انه بيرتاح معاكي .

 متثريش غيرته

كتير من البنات في اعتقادهم انها لو اثارت غيره الشريك هتتأكد من حبه ليها ومدي رجولته ، ولكن بالعكس تماما انتي كدا بتثيري غضبه وبتتسببي في حدوث مشاكل كتيره بينكم ومن الممكن يوجه ليكي كلام سئ ويأمرك انك متخرجيش من البيت ، فانتي لازم تبتعدي تماما عن اثاره غيرته واغضابه بالشكل اللي يلمس رجولته .

 متبالغيش في تنازلك

فتره الخطوبه هي الاساس لحياتك بعد كدا ، فلازم متتنازليش فيها عن حقوقك كأنثي لها حياتها وخقوقها الخاصه زي طلبه ليكي بالتنازل عن شغلك او أختيار لبسك بذوقه الشخصي او يامرك بالدخول والخروج من المنزل بإذن شخصي منه او التحكم في علاقتك باصدقائك البنات واختياره لافضل منهم والاسؤء ، وغيرهم الكثير .