أمهات كتير بيصبهم قلق لو حسوا أن طفلهم مش بيستجيب للأصوات وبيدأ يبقي عندهم مخاوف من أنه يكون عنده مشكلة في حاسة السمع أو أن الطفل مش بيسمع. طيب عشان تتأكدي من قدرة أبنك علي السمع تابعي الخطوات الي في المقالة لكن مهم جدا تعرفي أنه النصايح والإرشادات دي مش كفاية لإصدار حكم نهائي علي قدرة الطفل علي السمع دول مجرد ملاحظات استرشادية تساعدك تقرري هل أنتي محتاجة لمراجعة الطبيب لتقيم سمع أبنك ولا لا.
رد فعل للأصوات العالية المفاجأة
الأطفال حديثي الولادة وحتي عمر ٣ شهور ممكن جسمهم يتهز لو كانوا قاعدين في مكان هادي وسمعوا صوت عالي مفاجئ.
التفاعل مع الأصوات
الأطفال حديثي الولادة ولحد عمر ٣ شهور ممكنن بعض الأصوات تساعدهم علي الإسترخاء زي صوت مامتهم وهي بتغني أو صوت “شششش” متقطع وأمهم بتنيمهم. من العلامات التحذيرية لو الطفل في السن ده مش بيتأثر بأي أصوات ومفيش أصوات بتهديه أبدا ولا بيعمل أي رد فعلا. مهم أن الأم متتسرعش في الحكم علي طفلها لأن في أطفال بيصبهم نوبات من العياط والبكاء ومش بيتأثروا بأي صوت في الحالة دي.
اصدار أصوات ممدوة
من العلامات التحذيرية برضو لو الطفل من عمر شهرين مش بيصدر أصوات زي “ممممم” أو “اووووو” أو أي أصوات ممدودة.
الإلتفات للأصوات
عادة الطفل من سن ٤ ل ٨ شهور بينموا عنده القدرة أن يبص في اتجاه مصدر الصوت. بمعني أنه لو حد دخل الغرفة وبدأ يتكلم ممكن تلاقي الطفل بيبصله وطبعا كل ما عمر الطفل بيكبر قدرته في الالتفات بتكون أكبر يعني ممكن الأطفال الأكبر يلفوا رقبتهم في اتجاه الصوت أو لو بيحبوا علي الأرض ممكن يلف جسمه في اتجاه مصدر الصوت سواء كان جهاز زي الموبيل أو صوت حد بيتكلم.
تقليد الأصوات
ابتداء من عمر ٦ شهور فما فوق بيبدأ الطفل ينمو عنده مهارة تقليد الأصوات. بعض الأطفال بتحاول تقلد الصوت أو النغمة الي سمعتها تقليد بسيط. دي برضو من العلامات المساعدة الي تدل ان ابنك بيسمع كويس.
الاستجابة ل لا
من عمر ٨ شهور أغلب الأطفال بتكون سمعت وفهمت كلمة لاء. من العلامات التحذيرية لو الطفل مش بيستجيب ل كلمة لاء أو التغيرات في نبرة صوت الأم. طبعا الأطفال في السن ده مش بيسمعوا الكلام بيطبيعتهم لكن المقصود هنا التفاعل مع كلمة لاء و التغيرات في نبرة صوت الأم بين صوت هادئ وصوت عصبي مثلا.
الاستجابة للاسم
الأطفال من سن ٩ شهور ل١٢ شهر بيكونوا عرفوا اسمهم في الغالب وبيستجيبوا ليه بمعني لو حد نده عليهم باسمهم بيبصولوه أو يتحركوا تجاهه أو بيعمل أي تصرف يدل أنه عارف اسمه.
نصائــــح
متستعجليش في الحكم علي الطفل ومتقارنيش ردود فعله بردود فعل أطفال تانية حتي لو في نفس سنه
لو لسه قلقانة اعرضي طفلك علي طبيب أطفال
تعليقات
إرسال تعليق