القائمة الرئيسية

الصفحات

ازاي اعمل بدل فاقد للرخصة الشخصية



ازاي اعمل بدل فاقد للرخصة الشخصية



لما الرخصة بتضيع وتحب ترجعها تاني إجراءاتها بتختلف شوية عن إجراءات استخراجها ،وعشان تتجنب تضيع الوقت قبل ماتبدأ في الإجراءات اتبع الخطوات التالية:-

اعمل محضر بدل فقد للرخصة

اول حاجة بتعملها لما الرخصة بتضيع منك بتروح المركز الخاص بيك تعمل محضر لفقد الرخصة برقم رخصتك القديمة عشان ادارة المرور تتاكد ان رخصتك مش مسحوبة

ولو ناسي رقم رخصتك الشخصية بتتجة لادارة المرور تاخده منهم عشان تعمل بيه المحضر لو رخصتك بالنظام القديم “يعني مش مستخرجة بالرقم القومي” وفي كل الاحوال بتاخد الاول من ادارة المرور طلب عشان تروح بيه النيابة تعمل المحضر

جهز الاوراق التالية

في حالة لو الرخصة سارية وعايز تروح تطلع بدل فاقد ليها
وتاخد باقي المدة بتجهز الاوراق التالية :-
  1. محضر فقد الرخصة
  2. صورة شخصية
  3. ملف رخصة خاصة و هتلاقيه في اي مكتبة قدام إدارة المرور
  4. البطاقة الشخصية ولازم تكون سارية
  5. صورتين من البطاقة الشخصية
  6. قيمة استخراج بدل الفاقد 25 ج ونموذج 56 من الخزنة وتمنه 6 جنيها

ولو رخصتك منتهية المدة بتجهز الاتي

بردو هتروح تعمل محضر فقد في القسم الخاص بيك و هتطلع شهادتين باطنة ونظر من أي مستشفى حكومي ولازم تاخد معاك صورتين شخصيتين ورسم استخراج الشهادتين 50ج وبتعملهم عشان هتاخد مدة جديدة للرخصة لانك بتكون بتعمل بدل فاقد وتجديد في نفس الوقت يعني 10 سنين

  1. صورة شخصية حديثة
  2. البطاقة الشخصية وصورة منها ” ولازم تكون البطاقة الشخصية سارية ”
  3. ملف للرخصة الشخصية من اي مكتبة

 نصائــــح للحصول على رخصة بدل فاقد

لازم تاخذ البطاقة الشخصية معاك في وقت استخراج بدل الفاقد بالذات لأن في الأغلب لما الرخصة بتضيع بيكون البطاقة معاها ولو مش معاك لازم تعمل بدل فاقد للبطاقة قبل ما تبدأ في إجراءات بدل الفاقد للرخصة يااما الادارة بتديك تصريح لمدة شهر ففط لحين عمل بطاقة
لازم يعدي على محضر فقد الرخصة 7 أيام قبل البدء في إجراءات استخراجها
شهادات الباطنة والنظر لازم تكون من اي مستشفي حكومية ولو عملتها من عند أي دكتور أو مستشفى خاصة مش هتتقبل وهتضطر ترجع تعمل واحدة جديدة من اي مستشفي حكومية عشان يتأكدوا من اعتمادها لأنها بتكون مختومة بختم النسر
لما بتروح تطلع بدل فاقد الموظف بيطلعلك الملف القديم بتاعك من الارشيف الاول وده إجراء اوقات بياخد وقت واوقات تانية مبياخدش عشان تكون عامل حسابك ولازم يكون معاك رقم الملف عشان يقدر يطلعه غالبا بيكون مكتوب على ضهر الرخصة ولو متعرفوش ابقي هاته من غرفة الكمبيو
مجرد ما تخلص الاجراءات تتجه لغرفة الكمبيوتر عشان تتصور وتاخد رخصتك وده في الغالب بياخد نص ساعة او ساعة بالكتير لو في زحمة
وقت العمل في الإدارة بيكون من 8 ل 2 ويفضل تروح من 9 ل1 عشان تضمن تخلص ورقك بسهولة ولان الخزنة غالبا بتقفل قبل المعاد الرسمي لانها بتكون بتعمل جرد لليوم


هل اعجبك الموضوع :

تعليقات