طبق البطاطس علي كل سفرة تقريباً في كل مكان في الدنيا ، طبق رئيسي ساعات و طبق جانبي ساعات أكتر ، مش بيحلي الاكل إلا بيها ، و علشان إحنا متعودين دايما نقليها في الزيت، حبينا النهاردة نغير و نقدملك البطاطس بشكل جديد و كمان صحي أكتر لإنه هيدخل الفرن. الطبق هو بطاطس ويدجز بالجبنة البارميزان علي طريقة المطاعم ، الطريقة سهلة جدا و التكاليف بسيطة و أكيد موجودة عندك في المطبخ دلوقتي، يعني هيكون عندك طبق لذيد ممكن تقدميه علي الفطار او العشاء و ممكن يكون طبق جانبي في الغذاء جنب لحوم او فراخ في أسرع وقت و بأسهل مكونات، يلا مع بعض نشوف المقادير و نبدأ نعمل البطاطس .
جهزي المقادير
4 حبات بطاطس ، 4 معالق صغيرة زيت زيتون ، 2 معلقة صغيرة ملح ، 2 معلقة صغيرة ثوم بودر ، 2 معلقة صغيرة بهارات ، ½ فنجان جبنة بارميزان ، 2 معلقة صغيرة بقدونس مقطع ، 2 معلقة صغيرة كزبرة مقطعة.
قطعي البطاطس
إغسلي البطاطس كويس جداً علشان مش هنقشرها و بعدين قطعيها على شكل ويدجز أو أجنحة عريضة زي اللي بناكلها في المطاعم.
سخني الفرن
سخني الفرن على درجة حرارة متوسطة ، و جهزي الصينية اللي هتحطي فيها البطاطس و إدهنيها كويس جداً بمعلقة زيت زيتون
إخلطي المقادير الجافة
في طبق إخلطي الملح ، الثوم البودر ، و البهارات .
إدهني البطاطس بالزيت
في الخطوة ده هنحط 3 معالق زيت زيتون في طبق و نبدا نغطس كل شريحة من البطاطس فيه و نقلبها علي الجانبين ، علشان تمتص بقية المقادير في الخطوات الجاية .
ضيفي الجبنة البارميزان
خرجي البطاطس في طبق بعد ما تكون إدهنت كلها بالزيت و رشي عليها الجبنة البارميزان .
ضيفي المقادير الجافة
دلوقتي رشي البطاطس بخليط الملح و الثوم البودر و البهارات ، قلبي كويس أوي علشان تتاكدي إن كل قطعة بطاطس متغطية بالجبنة و البهارات .
إخبزي البطاطس
حطي البطاطس في الصينية اللي دهنتيها زيت و دخليها الفرن ، هتاخد حوالي من 25 ل 30 دقيقة لحد ما تستوي و تتحول للون الذهبي الجميل .
قدمي و إستمتعي
بعد لما تخرجي البطاطس من الفرن ، قدميها في طبق و زينها بالبقدونس و الكزبرة و قدمي معاها كاتشاب ، مايونيز ، أو مستردة.
نصائــــح
إفتكري تسخني الفرن قبل ما تبدأي الخطوات علشان ده هيوفر عليكي وقت الخبز .
ممكن تستغني عن الجبنة البارميزان و تستعملي جبنة موتزاريلا أو شيدر مبشورة .
ممكن تضيفي أي توبنج علي البطاطس لما تخرج من الفرن زي ،جبنة رومي مبشورة ، جبنة شيدر مبشورة ، أو أي إضافة تفضليها
قدمي مع البطاطس سلطة كول سلو أو سلطة خضراء و بكده تكون وجبة متكاملة
ممكن تقدمي مع البطاطس ديبنج تغمسي فيه البطاطس و ده مكوناته سهلة (4 معلقة كاتشاب ، 2 معلقة مايونيز ، معلقة خل ، معلقة سكر ، بصلة مبشورة )
تعليقات
إرسال تعليق