ازاي اعمل جروب تسويقي لمنتجاتي ناجح

دلوقتي الشغل مبقاش لازم يكون بره البيت سواء في شركة او مكتب وبقي في طرق كتير جدا للربح من البيت عن طريق الانترنت ، من الطرق اللي بتستخدم لعمل بيزنس خاص بيك من البيت لتسويق منتجاتك هو جروب علي الفيس بوك ، لكن زي ما اي شغل ليه عوامل نجاح كمان الجروب ليه عوامل ممكن تساعدك وتخليه ينجح ويكبر وعوامل تخليه ميحققش النتيجة المطلوبة .

اختار اسم مناسب للجروب
اختار اسم للجروب ليه علاقة بمشروعك او منتجك عشان لما حد يعمل سيرش (بحث) علي المنتج او الخدمة دي يظهرله الجروب بتاعك من ضمن الاختيارات في الاول .

خلي كمان اسم الجروب بالعربي وبالانجليزي عشان لو حد عمل بحث علي الحاجة دي بالعربي تظهرله في نتايج البحث ولو عمل عليها سيرش بالانجليزي تظهرله وبكده هتبقي كسبت عدد اكبر من العملاء .

خلي اسم الجروب سهل عشان اي حد لما يجي يعمل بحث عليه بفتكره بسهوله ميبقاش اسم صعب علي الشخص انه يحفظه او يفتكره .

اعمل خطة لمشروعك
اعمل خطة للجروب وتعامل معاه علي انه مشروع علي ارض الواقع وحط خطة تمشي عليها ، خطة انك ازاي تحسن المشروع وتزود من المنتجات اللي بتبيعها وازاي تكبره ؟ .

اعمل دراسه جدوي بشكل بسيط جدا وخليك بادئ عندك رؤيه للموضوع مش تتحرك بشكل عشوائي يوم بيومه ،واحسب الفلوس اللي هتصرفها علي المنتج وتسويقه وشحنه والمكسب قبل ما تبدا عشان متفاجئش بمشاكل طارئة مكنتش عامل حسابك عليها .

اصرف علي المشروع في البداية ، في البدايه انت اللي هتحتاج تصرف علي المشروع لفترة عشان يكبر ويتعرف ويتسوق لحد مايبقي في مؤشر استقرار وتكون قدرت توقفه علي توقفه علي ارض صلبة .

استهدف مناطق معينة
في البداية لازم تستهدف مناطق معينة جمب بعضها عشان يكون سهل عليك الشحن والتوزيع ومتتاخرش في توصيل المنتج للعميل ، وعشان التوزيع ميكونش صعب عليك وفي اماكن مختلفه ويتاخر تسليم المنتج ويخليك تخسر جزء من العملاء ،خلي الجروب في البداية محصور علي مناطق معينة .

حط خطة بانك في المستقبل توصل لمناطق مختلفة وتقدر توصل لمناطق بعيدة عن طريق الاتفاق مع شركة شحن ، ولكن راعي توصيل المنتج في اقرب معاد ممكن بعد طلبه .

شغل ناس معاك
شغل ناس معاك كل شخص يكون ليه دور عشان المشروع يستمر ويكبر من المهم انه ميكونش قايم علي فرد واحد فقط لان ده مع الوقت بيبسبب تعطيل الشغل او تاخير توصيل المنتجات او شرائها اعمل فريق صغير وابدء وزع الادوار عليكوا واديهم جزء من الربح مع الوقت هتقدر تكبر مشروعك لان في اكتر من فرد شغال عليه ، متقومش بكل الادوار (المدير -والبائع-المسوق-الموزع)مفيش مشروع بيدير كل ادواره شخص واحد ولو حصل فالتوقف عن المشروع امر متوقع حدوثه بنسبة كبيرة .

اتفق مع محل يسلم منتجاتك
اتفق مع شخص او محل وليكن سوبر ماركت او اي محل يسلم للناس منتجاتهم وياخد نسبه بسيطه من الربح هيسهل عليك عمليه التوزيع وهيوفرلك وقت في حالة اذا قررت تبدا مشروعك في مدينتك او منطقة سكنك ، افضل ما تبقي مضطر توصل للناس منتاجتهم بنفسك لان ده هياخد وقت كبير منك في المجهود والوقت .

استخدم صور للمنتج حقيقية
حاول تستخدم صور للمنتج حقيقيه بتصويرك في الواقع عشان اللي بيشتري يبقي عنده نوع من المصداقيه في خامة وجودة المنتج ، وان ده نفس المنتج الحقيقي اللي هيستلمه مش منتج غيره سئ او اقل في الجودة .

استخدم صور بجودة تصوير عالية
صور المنتج بكاميرا احترافية او بكاميرة موبايل جودته عاليه ، كل ما كانت جودة الصورة عالية كل ما زود من نسبة بيعها ومن نسبة عدد العملاء المحتملين للشراء ،منتج متوسط بصورة جيدة افضل من منتج جيد بصورة رديئة .

حاول تخصص جزء من بيتك او اي مكان يكون شكله منظم وشيك والوانه مبهجه وتصور فيه المنتجات حاول تتعلم اساسيات عامه عن تصوير المنتجات من علي النت وصورها بافضل طريقة ممكنة ، وحافظ ان تكون بخلفية جيدة والاضائة جيدة .

اختار الوقت المناسب لتنزيل البوستات
اختار الوقت المناسب للفئه اللي بتتعامل معاها ، من المهم انك تعرف الفئة اللي بتستهدفها وانسب المواعيد اللي بيكونوا متواجدين فيها علي النت او محتاجين فيه لمنتجك هل انت بتخاطب شريحة ستات البيوت ولا الشباب ولا اصحاب الشركات ؟ ، علي سبيل المثال كان جروبك خاص بالاكل فممكن تثبت معاد للبوست الاول٢ الظهرا وقت الغدا وبوست تاني ١٠ مساءا .

ثبت عدد مرات تنزيل البوستات
ثبت عدد مرات تنزل بوست لمنتجك فليكن من 2-3 في اليوم ، متنزلش في يوم 10 بوستات ويوم تاني متنزلش اي بوست ، حاول تثبت معدل البوستات يوميا بحيث ان الناس يبدا يثبت في دماغهم عدد مرات البوستات ومواعيدها .

خصص مبلغ للدعايا
في البدايه لازم يعرفك الناس عشان يبدؤا يشتروا منك ، خصص مبلغ للدعايا لما تبدا تنشئ جروب ،ضيف اصدقاء من المكان اللي عايز تسوق فيه منتجاتك وخصص لكل صديق هيضيف لجروبك ناس هديه علي سبيل المثال هدية زي (مج-طرحه-مادليه_ميكب )كل ما ضافت من ٣٠٠-٥٠٠ شخص ، بالطريقه دي هتقدري تبني قاعدة عملااء .

اكتب رسالات للرد
اكتب رساله محفوظه علي الموبايل للرد علي اللي بيدخل للاستفسار عشان توفر وقت كبير مثال {اهلا بك احمد ، يرجي وضع صورة المنتج الخاص باستفسارك ،وجميع الاسئله الخاصه به برساله واحده لكي يتم الرد علي جميع استفساراتك باسرع وقت }وارسلها للي بيدخل يستفسر ، وبكدة هتكون وفرت علي نفسك وقتك كبير من النقاش ، لكن ده لا يتعارض مع الرد علي استفسارتهم بافضل طريقة ممكنه وباسرع وقت .

ادرس منافسينك
اعمل مقارنة بين سعر منتجك وسعره بالمحلات ومع منافسينك عموما وخليك حريص علي ان سعر منتجك ميكونش اعلي من نفس المنتج في مكان تاني .

ابحث عن اكتر من موزع لمنتجك
ابحث عن منتجك بافضل سعر ليه ودور علي اكتر من تاجر وبديل عشان متتوقفش تجارتك بمجرد حدوث اي مشكله من ناحية التاجر .

متتسرعش في حكمك
اخيرا احرص علي الصبر ، اي مشروع بيحتاج لبداية ودراسه واستمرار للحكم عليه متتسرعش في حكمك علي نجاحه في البداية وخلي عندك مرونة لتخطي العقبات اللي بتقابلك .