ازاي اعمل خير في رمضان

شهر رمضان شهر الاحسان والصدقة والعمل الطيب ،ولان في اشكال كتيره لعمل الخير حبينا نتكلم في اسهل الطرق اللي تقدر تعمل بيها خير بحيث لو حد مش قادر ماديا يتصدق او يطلع عمل الخير بشكل مادي يقدر يعمل ويكون راضي عن نفسه ،او لو قادر ماديا ومش عارف يعمل ايه يقدر يعرف من خلال الخطوات التالية:-

 استحضر النية


لو عايز تعمل خير انوي عمل الخير من اجل الخير وراجع نيتك دايما بينك وبين نفسك عشان تبعد نفسك عن الرياء لان في ناس كتير بتعمل الخير من اجل الرياء والتظاهر من غير قصد ومراجعة النفس دايما وتذكيرها بالنية بينقيها من اي سوء

واستحضار النية لعمل الخير دايما بيفتح الابواب والاسباب اللي تخليك تعمله لو حتي غير قادر ماديا او معندكش وقت

قابل الإسائة بالاحسان
من اكتر الاسباب اللي بتفسد صيامنا هي معاملة الناس معاملة سيئة بحجة ان هم ناس مستفزة ومعاملتهم غير طيبة ، ولو عايز تاخد ثواب في الناس دي عاملهم معاملة حسنة واكظم غيظك ،هيتحسبلك في ميزان حسناتك وممكن تكون سبب في ان الناس دي تغير معاملتهم السيئة وتغيرهم للاحسن وبكدة هتنشر الخير بين الناس من خلال معاملتك الحسنة ليهم ومن غير ماتتكلف نفسك اي شئ ولا تبذل اي مجهود

ومن اكتر المشاكل اللي بتحصل في رمضان بسبب الصيام بتكون في المواصلات لان الجو حر واغلب الناس والسواقين خصوصا بتكون مش طايقة نفسها وبتزهق وبيخلص الموضوع بخناق والفاظ بزيئة وطبعا فساد الصيام ولما تكون انت سبب في ان الخناقة تهدي سواء كانت معاك او مع غيرك او متحصلش من الاساس هتكون عملت اكبر خير في الناس دي

ابتسم
الابتسامة صدقة ومفيش اي علاقة بين انك مهموم او عندك مشاكل بإن يبقي وشك عبوس ودايما مكشر ،النبي عليه الصلاة والسلام كان اقل الناس هما ولكنه كان اكثرهم تبسما ،والابتسامة معدية جرب تبص لحد مبسم بتلاقي نفسك بتبتسم تلقائيا ولغة من غير كلام لنشر الخير بين الناس عشان كده ربنا سبحانه وتعالي جعلها صدقة

الرسول عليه اللاة والسلام قال ( أنكم لن تسعوا الناس بأموالكم فليسعهم منكم بسط الوجه وحسن الخلق ) رواه مسلم

 ادخل السرور علي قلب مسلم
من احب الاعمال الي الله هو ادخال السرور علي قلب المسلم او تفريج همه او قضاء دينه ،، اسال علي صحابك ومعارفك لو حد منهم عليه دين اقضيه او اقضي جزء منه لو تقدر وتقدر تسال علي الغارمين اللي بيكونوا محبوسين بسبب ديون بسيطة جدا عليهم وتفرحهم انهم يقضوا رمضان مع اولادهم وحبايبهم

ولو متقدرش علي سداد الديون تقدر تفرج هم مهموم عن طريق حلك لمشكلة عنده ممكن تكون بسيطة وتقدر تتدخل وتحلها مع الشخص التاني زي اب متخانق مع ابنه او زوج وزوجتة او 2 صحاب متخانقين لو علاقتك باللي عنده مشكلة تسمحلك بالتدخل هتبقي عملت خير كبير في الشهر الكريم

وفر بيئة الامان وزيل الوحدة عن سلم
لو دورت حواليك اكيد هتلاقي حد ابوه ميت او ارملة كل مشكلاتهم انهم مش حاسين بالامان في الوقت الحاضر اللي اكتر مشكلة بقت موجودة فيه هي عدم الامان ، تقدر تسال عليهم من وقت للتاني لمجرد احساهم ان في حد موجود يقدروا يرجعوله لما يكون عندهم مشكلة او حد ضايقهم

 اكثر الزيارات والانصات
دايما في رمضان بنعمل عزومات كتير وبندعي الاهل وبننسي اننا نقدر نعمل الخير من خلال الزيارات دي، غير ثواب افطار الصائم اللي ان شاء الله ربنا يحتسبه ليك جدد نيتك في انك تسمعهم من اجل اسعادهم لان الناس دايما بتحب اللي بنصت ليها باهتمام واجل الكلام عن نفسك شوية عشان تاخد الثواب في الشهر الكريم وخليهم يمشوا من عندك وهما مبسوطين

او تزورهم انت بعد صلاو التراويح وتسال عليهم مش شرط يكون عزومة علي الفطار وتكون نيتك هي عمل الخير عن طريق السؤال عنهم

نصائــــح
رمضان شهر واحد في السنة حاول تستغله باكبر قدر ممكن من المعاملات الحسنة وافشاء السلام بين الناس لان الناس في حاجة للمعاملات الطيبة جدا اكتر من حاجتهم لاي شئ تاني
تذكر دايما ان انت اللي في حاجة لعمل الخير اكتر من اللي بتعمله نفسه

 #اعمال الخير اليومية, #اعمال الخير في رمضان, #اعمال خير بسيطة, #افكار لعمل الخير في رمضان, #حديث عن فعل الخير في رمضان, #عمل الخير في رمضان, #عمل الخير ومساعدة الاخرين, #فضل عمل الخير في شهر رمضان