ازاي اكون متصالح مع نفسي

ازاي تبقي متصالح مع نفسك وحاسس انك راضي عن نفسك ، الاحساس اللي كتير مننا بيفتقده ودايما بيسال نفسه ازاي اوصل لشعور التصالح والرضي عن النفس ده ، واكتر وقت غالبا بيفكرنا بالسؤال ده لما بنقابل اشخاص عنهم التصالح ده والرضي وعشان نجاوبك علي السؤال ده هنقولك بعض انماط التفكير اللي غالبا بتكون السبب في الاحساس بالرضي .

الحياة تجارب


معظم الخيبات اللي في حياتنا اللي بتخلينا مش متصالحين مع نفسنا اننا نكون مرينا بتجارب سيئة ويكون عندنا خوف من الجاي او اننا نحكم علي انفسنا اننا هنفشل في الجاي بسبب فشلنا قبل كده …

اعرف ان الحياه هي عبارة عن سلسلة من التجارب وان مفيش فشل ، الفشل بيحصل فعلا لما بتكون نظرتنا للتجربة وتقيمنا ليها علي انها فاشلة ، كل التجارب السيئة هي طرق انت بتجرب فيها لغاية لما تقدر توصل للطريقة الصح ، المهم متكونش بتعيد نفس التجارب باخطائها ، الحياة مليانة بالتجارب الغير منتهيه اللي اكيد فيه تجربه فيهم هتقدر تنجح فيها ، خوض تجارب كتير ومختلفه ومتياسش .

متقيمش نفسك علي وضعك الحالي


كتير بنحس اننا محبطين ومش راضيين عن نفسنا بسبب اقتناعنا باننا نستحق الافضل او بسبب اننا موجودين في مكان ما بظروف معينه مش متقابلينها ولا راضيين عنها سواء كانت في الشغل او في البيت او في الاشخاص اللي احنا متواجدين معاهم …

اعرف ان مفيش شخص بيفضل طول حياته علي نفس وضعه، واعرف ان الفترة الانت فيها حاليا هي فترة مؤقته متحكمش علي نفسك بامكانياتك الحاليه وانك هتفضل بنفس الوضع طول عمرك واعرف ان معظم الناس العظماء كانت بدايتهم بسيطة ،متقيمش نفسك بالظروف الحاليه اشتغل علي نفسك وعلي احلامك وتوقع الافضل وان ممكن في المستقبل تبقي ظروفك مختلفه تماما عن دلوقتي ، متبصش لنفسك بصة دونية لمجرد ظروف اضطريت تبقي فيها لفترة من حياتك ومتخليش كلام الناس ياثر عليك ،امن من جواك انك قادر تغير من ظروفك تماما وان الظروف دي تكون سبب في تعليمك المهارات اللي محتاج تكتسبها عشان تكون شخص افضل .

 ركز علي نفسك واهدافك


من ضمن الحاجات اللي ممكن تخلي شخص يتحول من الايجابية للسلبية ،هو مقارنة نفسه بالناس اللي حواليه وتركيزه مع قدراتهم ومهاراتهم وانجازاتهم ، ركز علي نفسك ، تمني للجميع الخير بداخلك واعلم ان وصول الخير لشخص مش هيمنع وصول الخير ليك وان الخير غير محدود ويقدر يكفي الناس كلها ولكن اللي هيمنع وصول الخير فعلا ليك هو تركيزك مع الغير وتجاهلك واهمالك لامكانتياتك وقدراتك وعدم تنميتها …

اشتغل علي نفسك كويس لغاية اما توصلها لافضل حال ترضي فيه عن نفسك ، تخيل دايما انك في سبق وبدل ما تبص علي هدفك والطريق اللي مفروض تقطعه في اقل وقت وباعلي اداء طول السبق عمال تبص علي اللي حواليك في الغالب كل اللي حواليك هيسبقوك وهتكون انت بتبذل اكبر قدر من الطاقه ومش هتوصل لهدفك لانك ضيعت اهم اللحظات في انك تبص علي اللي حواليك بدل ما تركز علي هدفك وتوصله .

اعرف ان اي مهارة عايز تكتسبها تقدر تكتسبها بالسعي والتعلم وانك تقدر تكون اي حاجه بتتمناها و فعلا كان عندك استعداد للمحاولة لعدد مرات غير متناهي لغاية لما توصل لهدفك .

سامح غيرك


حاول تسامح كل الناس اللي كان ليك علاقة بيهم في حياتك مهما كانوا سيئين ، متحاولش تحمل كراهيه او حقد من ناحية شخص ما لان ده هيؤثر عليك انت بالسلب وعلي نفسيتك ومزاجتيك كل ما تحاول تفتكر ان في شخص ما اذاك وضايقك …

اعرف ان حياتك كبيرة وانك بطريقة حتمية هتحتك وتتعامل وتكون علاقات مع عدد كبير من الناس هتقابل الاشخاص الكويسين واللي بيتعاملوا باحسان وهتقابل اشخاص سيئين وممكن يردوا دايما باساءة حتي لو كنت بتعاملهم باحسان وان ده هيجي عليهم بالسلب دايما وانهم لو متعلموش من اخطائهم وحاولوا يعدلوا من نفسهم هيخسروا كل شئ وهيضروا نفسهم قبل ما يضروك .

فحاول متاخدش الموضوع بشكل شخصي ، واعرف ان ده مش غلط شخصي منك ما لم تسئ اليهم ، تمني ليهم ان هما يبقوا افضل وحاول تتخطاهم وتشيلهم من تفكيرك وتشيل طاقة الكراهيه اتجاههم ، لان طاقة الكراهيه اول شخص بتضره صاحبها اعتبرها تجربة وعدت.

 اتعلم من الماضي وتقبله


من الحاجات اللي ممكن تخلي شخص مش راضي عن نفسه هو ان الشخص تجيله افكار عن الماضي واللي حصل فيه ، حاول تعرف ان كل حدث بيحصل في حياتك هو حدث مهم عشان تتعلم منه ويقويك ويضيفلك مش عشان يكسرك او يسبب اثار سلبية عليك ، حاول دايما تفكر بالمنظور ده طول الوقت ،..

متفضلش ترمي علي نفسك اللوم بسبب علاقات فاشلة او خسارة معينة حصلت في حياتك ، حاول تفكر في ايه الحاجة اللي مفروض تخليك احسن من العلاقات او الخبرات دي ، روح خد كورس في العلاقات والاخطاء اللي بتحصل فيها ممكن تهدمها واتعلم ازاي تقيم علاقة ناجحة المره الجاية ، او خد كورس في ايه المهارات اللي بتطلبها الشركات عشان تقدر تحصل علي الوظيفة اللي عايز تكمل فيها في مقابلة العمل الجاية…

حاول تخلي الماضي يكون سبب بنائك مش هدمك فكر في الحاجات اللي ممكن تطور نفسك فيها وانسي الماضي او كل ما تفتكره وتبدا تحزن او تلقي اللوم علي نفسك او علي اللي حواليك استخدم تدريب الامتنان وكمل مسار يومك افضل من الاول .
idea نصائــــح
امتن واشكر كل لحظة عشتها في حياتك وتصالح معاها وكمل .
استغل اي فرصة تقدر تكون فيها افضل وتزود احساسك بالرضي عن نفسك .
غالبا عدم التصالح مع النفس بيكون بسبب تفكير داخلي مش بسبب احداث خارجية والدليل علي كده ان بيكون في شخصين بيعيشوا نفس الظروف وفي شخص بيكون سعيد في حياته وبيطور من نفسه وشخص تعيس وفي حالة من الياس والاحباط ، اصلح من تفكيرك ونظرتك للامور .

 #الشخص المتصالح مع ذاته, #المصالحة مع النفس, #كيف اتصالح مع نفسي, #متصالح مع نفسك, #متصالح مع نفسه in english, #متصالحة مع ذاتي, #متصالحة مع نفسي, #مفهوم المصالحة مع الذات
PREVIOUS POST

ازاي استمتع بحياتي مع تأخر سن الزواج