عشاق القهوة و الكاكاو و الشوكولاتة يجمعوا هنا بسرعة. النهارده الوصفة ليكم . عارفين القهوة و الشوكولاته بالنسبة ليكم إيه ، علشان كده قررنا نجمعلك الإتنين في وصفة واحدة ، وصفة حاجة حلوة . هنقدملكم النهاردة أحلي تيراميسو في الدنيا ، التيراميسو بيتعمل بمليون طريقة ، بس النهاردة علشان نوفر وقتك و مجهودك جبنالك أسهل طريقة تطلعي بيها نتيجة أحلي من التيراميسو اللي ممكن تاكليه في المطاعم ، في خطوات بسيطة و بمكونات مش غالية هيكون عندك حاجة حلوة تقدميها لأسرتك و كمان لضيوفك بدل الحلويات التقليدية اللي أكيد مش بتظهر شطارتك و لا بتطلعي فيها مواهبك ، يلا مع بعض نعمل موس التيراميسو في أقل من 15 دقيقة .
جهزي مقادير موس التيراميسو
معلقة و نص قهوة سريعة الذوبان ، ربع فنجان ميه سخنة ، فنجان كريمة مخفوقة ، فنجان و نص سكر مطحون ، ربع كيلو جبنة كريمي ، معلقة صغيرة فانيلا ، معلقة كبيرة كاكاو ، قالب شوكولاتة .
دوبي القهوة
في طبق صغير دوبي معلقة ونص قهوة سريعة الذوبان في ربع فنجان ميه سخنة ، و سيبيه يبرد لمدة 5 دقايق .
إضربي السكر و الجبنة
دلوقتي في طبق كبير حطي فنجان و نص سكر مطحون و ربع كيلو جبنة بيضة كريمي و اضربيهم بالمضرب اليدوي أو الكهربائي ، ضيفي بعد كده معلقة فانيلا و القهوة اللي دوبتها في الميه في الخطوة اللي فاتت .
ضيفي كريمة الخفق
بعد ما تضربي خليط السكر و الجبنة و الفانيلا و القهوة ، ضيفي كريمة الخفق و اضربي تاني بالمضرب .
قدمي موس التيراميسو
حطي الخليط اللي فات في كيس التزويق و ضيفي أول طبقة في الكوباية و بعدين رشي كاكاو بطريقة حلوة و فنية ، و حطي طبقة تانية من الخليط و رشي كمان شوية كاكاو ، و لما تخلصي كل الطبقات ابشري قالب الشوكولاتة و ووزعيه علي السطح كله ، دلوقتي موس التيراميسو بقي جاهز علشان تتمتعي بيه إنتي و عيلتك.
نصائــــح
المقادير اللي فاتت تكفي 4 كوبيات من موس التيراميسو ، و طبعا هتزودي أو تنقصي المقادير حسب عدد الأفراد.
خلي آخر طبقة من الشوكولاتة المبشورة مش من الكاكاو علشان تكون طعمها حلو بدل طعم الكاكاو المر شوية .
حطي موس التيراميسو في الثلاجة كام ساعة قبل التقديم و بكده النتيجة تبقي أحسن.
ممكن تزودي كمية القهوة سريعة الذوبان في موس التيراميسو أو تقلليها حسب رغبتك.
لون موس التيراميسو هيتوقف علي كمية القهوة سريعة الذوبان اللي هتحطيها .
علشان تعملي فنجان كريمة خفق إضربي 2 كيس كريم جانتيه مع 2 فنجان صغير لبن بالمضرب اليدوي أو الكهربائي كويس و حطيهم في الثلاجة شوية .
ممكن تزوقي موس التيراميسو و تحطي بسكويت بشكل جميل في الكوباية و ده كمان هيزود القيمة الغذائية
#تيراميسو بالصور, #تيراميسو سهل جدا, #طريقة تيراميسو سهلة, #طريقة عمل التيراميسو الايطالية, #طريقة عمل التيراميسو بالصور, #طريقة عمل التيراميسو فتافيت, #طريقة عمل التيراميسو منال العالم, #طريقة عمل تيراميسو سهل
تعليقات
إرسال تعليق