لو حبيتي تعملي عشاء مختلف ، حاجة خفيفة للرحلات أو أكلة إقتصادية تعمليها علي الغداء مع شوية بطاطس و سلطة لازم صنف النهارده تكون من أول الحاجات اللي تيجي في بالك ، فطاير صغيرة بالفراخ و الخضار ، مش هنستعمل فيها غير قطعة فراخ واحدة بس ، يعني سعرها هيكون علي قد الإيد ، و كمان كلها خضار يعني مغذية و صحية. الحلو كمان في وصفة النهارده انها مناسبة لموسم الرجوع للمدارس و ممكن تكون فكرة كويسة جداً و مغذية لللانش بوكس بتاع ابنك أو بنتك . بلا بينا نتابع أسهل فطيرة ممكن تعمليها و مش هتاخد من وقتك أكتر من 20 دقيقة .
جهزي المقادير
½ فنجان دقيق ، معلقة صغيرة بيكنج بودر ، ذرة ملح ، ½ فنجان لبن ، 2 بيضة .
مقادير الحشو
معلقة كبيرة زيت ، قطعة فراخ فيليه ، ½ فنجان بصل مقطع ، ½ معلقة صغيرة ملح ، ¼ معلقة صغيرة فلفل إسود ، ¼ معلقة صغيرة زعتر ، فنجان جبنة شيدر ، ½ فنجان شوربة فراخ ، ½ فنجان جزر مبشور ، ½ فنجان بسلة مجمدة .
جهزي الحشو
حضري طاسة فيها معلقة زيت و حطي فيها الفراخ الفيليه المقطعة و قلبي و سيبها علي نار هادية من 5 ل 7 دقايق ، ضيفي البصل المقطع و شوربة الفراخ ، و بعدين ضيفي الخضار و قلبي و سيبي الخليط علي النار حوالي 5 دقايق ، لما السائل كله يتشرب ضيفي الجبنة المقطعة .
جهزي العجينة
في طبق عميق إضربي ( الدقيق و البيكنج بودر و الملح و اللبن و البيض ) بالمضرب لحد ما تختلط كل المكونات ببعض .
جهزي صينية المافن
دلوقتي جهزي صينية المافن أو الكاب كيك (الصينية المقسمة دواير) اللي هتحطي فيها العجينة و ادهنيها بالزيت .
صبي الخليط في الصينية
العجينة و الحشو دلوقتي جاهزين هنبدأ نصب في كل فتحة معلقة عجين و عليها معلقة حشو . بلاش تزودي أكتر من كده علشان العجينة بتنفش .
إخبزي الفطاير
حطي الصينية في فرن ساخن من 25 ل 30 دقيقة أو لحد ما تستوي الفطاير . ممكن تختبري السوي بطريقة الخلة المشهورة (دخلي خلة في العجينة و لو طلعت نضيفة يبقي الفطاير جاهزة ) و بعدين خرجيها من الفرن و سيبيها تبرد .
زيني الطبق و إستمتعي
الفطاير دلوقتي جاهزة ممكن تقدميها في طبق التقديم بشكل جميل
نصائــــح
سخني الفرن قبل ما تحطي الصينية علشان الفطاير متنشفش.
متحطيش العجينة و الحشو في كل الفتحة و سيبي فراغ للعجينة علشان تتمدد فيه .
ممكن تعملي كميات من الفطاير و تحتفظي بيها في الفريزر و تخرجيها قبل ما تستعمليها بفترة و بكده هيكون عندك أكلة جاهزة و سريعة للفطار أو الغدا
ممكن تستبدلي الجبنة الشيدر بأي نوع جبنة تفضليه أو متوفر عندك.
تعليقات
إرسال تعليق