لو إنتي من عشاق الشوكولاته ، النهارده هنتعلم مع بعض نعمل حاجة حلوة من 3 مكونات بس. و مش هتحتاجي دقيق ولا بيض ولا زبده ، كله شوكولاته في شوكولاته. هو فيه أحلي من كده؟ لا طبعا ؛ و كمان مش هتحتاجي الفرن و هترتاحي من مشاكل الخبز ، يعني من الآخر دي تقريباً أسهل حاجة ممكن تعمليها لو عايزة حاجة حلوة في نص الليل من غير مجهود . يلا بينا نشوف مع بعض طريقة ترافل الشوكولاته.
جهزي المكونات
20 قطعة بسكويت أوريو ، 5 معالق شوكولاته نوتيلا كبيرة ، فنجان شوكولاته سايحة ، سبرنكلز أو أي حاجة للتزيين (اختياري) .
إضربي بسكويت الأوريو مع النوتيلا
حطي الأوريو و النوتيلا في الفود بروسيسور ( الكبة ) و شغليه لحد لما الخليط يبقي ناعم. الموضوع ده ممكن ياخد حوالي دقيقة ، بتعتمد على الفود بروسيسور بتاعك و قوته.
شكلي الخليط و دخليه التلاجة
لو حسيتي إن الخليط ناعم أوي و إنك مش هتعرفي تشكليه ، سيبيه في التلاجة لمده ربع ساعة ( مش أكتر من كده علشان مينشفش و تعرفي تشكليه) و بعدين شكليه على شكل دواير . لو الخليط كويس و متماسك ، إبدأي شكليه على طول . كل دايرة تكون بمقدار معلقة كبيرة من الخليط . حطي دواير الترافل في صينية مفروشة بورقة زبدة. بعد كده دخلي الترافل التلاجة مرة كمان علشان تمسك في بعض.
سيحي الشوكولاته
ممكن هنا تستخدمي أي نوع شوكولاته ساده انتي بتحبيها.هاتي الشوكولاته اللي إخترنيها و سيحيها. ممكن تعملي كده بطريقتين: الأولي إنك تسيحي الشوكولاتة في الميكروويف ، و ده طريقة سريعة لكن لازم تكوني حريصة علشان لو زودتي فترة التسخين ممكن الشوكولاتة تتحرق ، إبدأي ب30 ثانية و شوفي التأثير و زودي كل مرة 30 ثانية لحد ما تسيحي الشوكولاتة، و الطريقة التانية علي حمام مائي و طريقة الحمام المائي سهلة، كل اللي تعمليه ، إنك تقطعي الشوكولاتة قطع صغيرة ، و تحطيها في حلة صغيرة و تحطي الحلة الصغيرة في حلة كبيرة فيها ميه سخنة و تسبيها من 5 ل 10 دقايق لحد ما تسيح.
غطي الترافل بالشوكولاته
طلعي الترافل من التلاجة ، غطسي كل واحد في الشوكولاته كويس جداً و حطيها مره تاني في الصينية على ورق الزبدة .
زيني و قدمي
رشي سبرنكلز على الترافل. ممكن تستبدلي السبرنكلز بشوكولاته بيضة ، جوز هند أو سوداني مطحون. ممكن تستغني عن التزيين خالص لو مش متوفر و تلتزمي بال3 مكونات الرئيسية بس . دخلي الترافل التلاجة مره أخيره قبل ما تستمتعي بأحلي و أسرع طريقة تاكلي بيها شوكولاته .
نصائــــح
ممكن تخزني الترافل في التلاجة لمده 5 أيام .
علشان نوفر شوية، ممكن تستبدلي النوتيلا بنوع شوكولاتة مصري ، هتلاقي إختيارات حلوة كتير في السوق .
تعليقات
إرسال تعليق